Kung Ikaw ay Mawawala, Hiling ko’y Saka na Lamang

by Kat Ongoco 

February 25, 2012

Kung ikaw ay mawawala,

Hiling ko’y saka na lamang

Dahil kaming mga nagmamahal,

Tiyak kong mababahiran

Ng lubos na kalungkutan.

Kung ikaw ay mawawala,

Hiling ko’y saka na lamang.

Napakarami pa ng pasko, bagong taon

At kaarawan na ika’y aming

Nais na makasama.

Kung ikaw ay mawawala,

Hiling ko’y saka na lamang.

Pangarap mo para sa akin, heto’t akin

pang unti-untingpinaghihirapan,

Nang medalya’y sa iyo maibigay.

Kung ikaw ay mawawala,

Hiling ko’y saka na lamang.

Utang kong buhay, Di man mababayaran

Ng kahit anong salapi o bagay

Tiyak na matutumbasan ng tagumpay.

Kung ikaw ay mawawala,

Hiling ko’y saka na lamang.

Sapagkat ang labis na pagmamahal

Ay aking tutumbasan, hanggang sa

huling pagsilay sa maaliwalas na mukha.